வாக்காளர் பட்டியலில் பெயர் சேர்க்க ஜனவரி மாதம் சிறப்பு முகாம்கள்: தலைமை தேர்தல் அதிகாரி அறிவிப்பு!

வாக்காளர் பட்டியலில் பெயர் சேர்க்க ஜனவரி மாதம் நான்கு  நாட்கள் சிறப்பு முகாம்கள் நடத்தப்படும் என்று தமிழக தலைமை தேர்தல் அதிகாரி சத்யபிரத சாகு அறிவித்துள்ளார்.

தமிழகத்தில் தற்போது உள்ள மொத்த வாக்காளர்களின் எண்ணிக்கை 6 கோடியே ஆயிரத்து 329 ஆக உள்ளது. அதில், 2 கோடியே 96 லட்சத்து 46 ஆயிரத்து 287 பேர் ஆண்கள், 3 கோடியே 3 லட்சத்து 49 ஆயிரத்து 118 பேர் பெண்கள், 5,924 பேர் மூன்றாம் பாலினத்தவர்.

இந்த பட்டியல், வரைவு வாக்காளர் பட்டியலாக 23-ந் தேதி வெளியிடப்படும். அதை வாக்காளர்கள் பார்த்து அதிலுள்ள தங்களின் விவரங்களில் திருத்தங்கள் மேற்கொள்ளலாம். புதிய வாக்காளர்களும் பட்டியலில் பெயர் சேர்ப்பதற்காக விண்ணப்பிக்கலாம்.

இதற்கு வசதியாக தமிழகம் முழுவதும் சிறப்பு முகாம்களை இந்திய தேர்தல் ஆணையம் நடத்துகிறது. இதுதொடர்பாக தமிழக தலைமை தேர்தல் அதிகாரி சத்யபிரத சாகு வெளியிட்டுள்ள அறிக்கையில் கூறப்பட்டுள்ளதாவது:-

சிறப்பு சுருக்க முறை வாக்காளர் பட்டியல் திருத்தத்துக்கான சிறப்பு முகாம்கள் அடுத்த மாதம் அதாவது ஜனவரி 4 மற்றும் 5- ந் தேதிகளிலும் 11 மற்றும் 12-ந் தேதிகளிலும் நடத்தப்படும்.

புதிய வாக்காளர்கள் பெயர் சேர்த்தல், விவரங்களை திருத்துவது, பெயர் நீக்கம் போன்றவற்றுக்காக வாக்காளர்கள் தரும் விண்ணப்பங்களைப் பெறுவதற்காக இந்த முகாம்களில் அலுவலர்கள் பணி அமர்த்தப்படுவார்கள் என்று கூறப்பட்டுள்ளது.

இந்த சிறப்பு முகாம்கள் மூலமாக பெறப்படும் விண்ணப்பங்களை பரிசீலித்து அதில் தேவையான திருத்தங்களை வாக்காளர் பட்டியலில் இந்திய தேர்தல் ஆணையம் மேற்கொள்ளும்.

பின்னர் அவற்றை இணைத்து பிப்ரவரி மாதம் 14-ந் தேதி இறுதி வாக்காளர் பட்டியல் வெளியிடப்படும்.